Pêvajoya Aştî û Civaka Demokratîk a ku Rêberê Gelê Kurd Abdullah Ocalan daye destpêkirin, berdewam dike. Bendewariya civak û gelan ev e ku desthilat û dewlet gavên şênber biavêjin. Piştgiriya herî xurt a ji bo pêvajoyê ji aliyê malbatên ku di şer de zarokên xwe winda kirine, hat dayîn. Malbat, dixwazin ku ev pêvajo bi aştiyê bi encam bibe.

 

Hevseroka Komeleya Alîkarî û Hevgirtinê ya bi Malbatên ku Xizmên xwe li Axên Qedîm Winda Kirine re (KATDER)Makbule Yavuzer, ji bo mîtînga “Hêvî û Azadî” ya ku dê di 4’ê Çileyê de li Amedê bê lidarxistin, banga tevlibûnê kir.

 

30 SAL IN GORA WÎ TUNE YE

 

Makbule Yavuzer di sala 1995’an de birayê xwe winda kir. Birayê wê Muslum Kaplan, di sala 1992’yan de dema li Enqereyê dijiya, tevlî Têkoşîna Azadiyê ya Kurd bû. Kaplan di sala 1995’an de jiyana xwe ji dest da, lê tevî ku 30 sal di ser re derbas bûne jî hêj goreke wî tune ye. Makbule Yavuzerê wiha behsa birayê xwe kir: “Birayê min bi zarokan re zarok, bi mezinan re mezin bû. Hemû navçeyê ew nas dikir. Bi mirovên ji her temenî re diyaloga wî hebû. Gel ji wî gelekî hez dikir. Em bi hêviya ku rojekê hestiyên birayê xwe bibînin dijîn.”

 

‘GELÊ KURD ÇI MAFÊN GELÊ TIRK HEBIN WAN DIXWAZE’

 

Makbule Yavuzerê bal kişand ser pêvajoya ku bi banga Abdullah Ocalan dest pê kiriye û ev tişt got: “Ew dixwaze rê li ber siyaseteke demokratîk vebike û daxwazên xwe bi siyasetê bîne ziman. Em jî êdî naxwazin mirin çêbibin. Bila ne leşker, ne polîs û ne jî gerîla jiyana xwe ji dest nede. Ji bo vê jî divê astengiyên li pêşiya siyaseta demokratîk bên rakirin.”

 

Makbule Yavuzerê bi bîr xist ku bi deh hezaran zarokên gelê Kurd di vê têkoşînê de jiyana xwe ji dest dane û wiha pê de çû: “Gelê me ewqas berdêl dan. Dayikên Kurd ewqas zarokên xwe winda kirin lê îro hêj jî dikarin bibêjin aştî. Divê dayikên Tirk jî dengê dayikên Kurd bibîhîzin. Gelê Kurd nasname, ziman û çanda xwe dixwaze. Gelê Tirk û gelên din xwedî çi mafan bin, Kurd jî heman tiştî dixwazin. Divê hemû gel karibin xwedî li nasnameya xwe derkevin. Zarokên me ji bo van mafên me canê xwe dan. Heke aştiyek pêk bê, divê mafên gelê Kurd bi temamî werin dayîn.”

 

‘EM JI BO AŞTIYÊ DERKEVIN QADAN’

 

Makbule Yavuzerê diyar kir ku ji bo aştiyê divê gelê Kurd û Tirk destê xwe bidin hev û wiha dirêjî da axaftina xwe: “Divê êdî hemû gel ber bi qadan ve biherikin. Bes e êdî em li malên xwe rûniştin. Me ewqas zarokên xwe winda kirin. Ji bo ku êdî zarokên tu kesî jiyana xwe ji dest nedin, divê em bi awayekî xurt li qadan bin. Divê azadiya fîzîkî ya muzakerevanê sereke yê aştiyê, Rêberê me bê misogerkirin. Hemû dinya paradîgmaya Rêberê me dizane û qebûl dike. Ji bo vê divê hemû gel beşdarî mîtînga ku dê di 4’ê Çileyê de bê lidarxistin bibin.”

 

Makbûle Yavuzerê destnîşan kir ku divê dewlet jî êdî bi gavên berbiçav bersivê bide pêvajoyê û wiha axaftina xwe bi dawî kir: “Ji bo aştiyekî birûmet divê zimanekî paqij û zelal bikar bîne. Em dizanin ku aştî ne tiştekî hêsan e, lê divê kesê ku aştiyê dixwaze zimanê xwe jî sererast bike.”

 

MA / Omer Akin