AMED - Di şewata 20’ê Hezîrana 2024’an a di navbera Amed û Mêrdînê de 15 kesan jiyana xwe ji dest da bûn. Serdozgeriya Komarê ya Xana Axparê lêpirsîna xwe temam kir û îdia kir ku “faîl nehatine tespîtkirin.”
Di 20’ê Hezîrana 2024’an de li navçeya Şemrexê ya Mêrdînê û Xana Axpar a Amedê şewat derket û 15 welatiyan di şewatê de jiyana xwe ji dest dan. Serdozgeriya Komarê ya Xana Axparê ji ber sûcê “Bi qisûriya xwe bûye sedema mirine û birîndarbûnan” lêpirsîn dabû destpêkirin. Serdozgeriyê, lêpirsîna xwe temam kir. Di fezlekeya dozgeriyê de îdiaya “faîlê şewatê nehate tespîtirin” hate kirin.
Di fezlekeyê de hate destnîşankirin ku di şewatê de 5 hezar û 345 hektarên çandî şewitîne, di qada şewatê de dora 2 hezar pez, gele pergalên avdanê û wesayîtên çandiniyê şewitîne û 15 welatiyên li qada şewatê asê mayin jî jiyana xwe ji dest dane.
NAKOKIYA DI NAVBERA RAPOR Û ŞAHIDAN DE
Şandeya Pisporan a ji 7 kesan pêk dihat di 15’ê Tebaxa 2024’an de raporek amade kir û îdia kiribû ku şewat ji ber trafoya ceyranê û têlên ceyranê dest pê nekiriye. Piştre jî Şandeya Pisporan a 9 Kesan yên di Sînorên Darazê de Peywirê Dikin a Serdozgeriya Komarê ya Enqereyê di 12’ê Kanûna 2024’an de raporek amade kir û îdia kir ku îxtîmala ku şewat ji ber ceyranê derketibe tune ye. Berevajî van îdiayên di raporan de ku di fezlekeyê de cih girtibûn, 28 gilîker û 19 şahidan jî di îfadeyên xwe de diyar kirin ku şewat ji ber stûnên ceyranê derketiye. Di fezlekeyê de ev îfadeya gilîker û şahidan cih girt: “Têlên ceyranê temas kirin û çirûsk derketin. Şewat jî ji ber van çirûskan derket. Min dît ku tê bi hev ketin û çirûsk derxist û bûn sedema şewatê.”
Di fezlekeyê de cih da encam û qenaeta dozgeriyê ku dibêje “Di encama lêpirsîna serdozgeriya me de faîl nehatine tespîtkirin.” Dosya, ji Serdozgeriya Komarê ya Amedê re hate şandin.
MA / Rûkiye Payîz Adiguzel