Berdevka Partiya Wekhevî û Demokrasiyê ya Gelan (DEM Partî) Ayşegul Dogan, têkildarî civîna Lijneya Rêveberiya Navendî (MYK) ku hêj didome, li navenda giştî daxuyanî da. 

 

Ayşegul Dogan, bal kişand ser mijarên di MYK’ê de li ser hatiye axaftin û got ku ew li ser meseleya demokratîkbûna Tirkiyeyê û aştiyê axivîne û got: “Ji ber ku bêyî aştiyê Tirkiye nikare demokratîk bibe.” 

 

‘NÊZ E KU EM DERBASÎ QONAXEKE NÛ BIBIN’ 

 

Ayşegul Dogan, da zanîn ku di civînê de li ser komîsyona tê payin li Meclisê were avakirin axivîne û got: “Em dikarin bibêjin ku êdî nêz e em derbasî qonaxeke nû bibin. Dikarin qala çendek lingên vê qonaxa nû bikin. Yek ji wan komîsyona tê payin li Meclisê were avakirin. Ev qonax, qonaxeke girîng e. Di vê mijarê de bendewarî û daxwaza civakê heye. Li ser vê komîsyonê li Meclisê jî konsensusek heye. Divê ev gav were xurtkirin. Amadekariyên hiqûqî dikarin bên xurtkirin û bi çendek amadekariyên yasayî bê bihêzkirin. Ji hêla mutebeqeta civakî ve anku ji hêla rewabûna civakî ve gelek girîng e. Lewma em dixwazin komîsyon bi sererastkirineke qanûnî were avakirin. Di rewşeke wiha de dê xebatên wê bibandortir û encamên wê bêhtir mayinde bin. Lewma me di serî de xwest ku rayeyên vê komîsyonê yên taybet hebin.” 

 

‘DIVÊ BI KOMÎSYONÊN JÊR RE CIVAK JÎ WERE DAXILKIRIN’

 

Ayşegul Doganê bi lêv kir ku weke partî ew qala aştiya civakî dikin, dixwazin xwe bigihînin hemû derdorên civakê, dema pêwîst kir divê bikare ji pisporan rapor û belge werin xwestin û divê mekanîzmayeke ku di dema biryardayinê de derdorên cuda yên civakî jî tê de cih bigirin wera avakirin. 

 

‘HEWCEYE PIRANÎPARÊZ BE’

 

Ayşegul Doganê, got ku yek ji rêgeza sereke ya partiya wan piranîparêzî ye û wiha domand: “Lewma divê lingê wê yê civakî xurt be û mekanîzmaya di nava civakê de tê avakirin jî ev komîsyona jêr e. Ev formulasyon e dibe lê divê bi awayekî xwe bigihîne komîsyonê û were nirxandin. Ev bo me girîng e. Her wiha partiyên komên wan li Meclisê tune ne dikarin çi bikin, dikarin çawa bên tevlikirin û nêrîn û pêşniyarên wan jî ji bo komîsyonê girîng e. 

 

EM DERBASÎ QONAXEKE NÛ DIBIN

 

Em derbasî qonaxeke nû dibin. Li gorî agahiyên bi me re hatine parvekirin, di hefteya pêş de dê çendek gavên dîrokî bên avêtin û em ê bi hev re şahidiya vê bikin. Her wiha têkildarî cih jî gelek gotin tên kirin. Derfeta me nîne em vê piştrast bikin. Dema aliyan daxuyanî dan dê ev zelal bibe. Gaveke dîrokî ya plankirî ku dê li Herêma Federe ya Kurdistanê were avêtin. Ev gav jî dê li gorî cîbicîkirina biryarên kongreyê be.

 

DEMA BERPIRSYARTIYEKÊ YE

 

Yek ji aktorên girîng ên pêvajoyê jî DEM Partî ye. Lewma amadekariyên me jî hene. Her çend li ber destê me agahiyên bisînor hebin û muxatabên yekser em nebin jî, em ê şahidiya geşedanên ji bo Tirkiye û Rojhilata Navîn dîrokî bikin. Ev ne tenê şahidiyeke, her wiha berpirsyartî ye. Divê kesek li gorî qonaxa pêvajo gihaştiyê xwe sist neke. Em ber bi qonaxeke ku bêhtir berpirsyartiyê bar dike û pêwîstiya wê bi gavên şênber û xurt heye ve diçin. Lewma em dibêjin ku hêj Lijneya Giştî navber nedayî, hêj Meclisê navber nedayî xebatên xwe divê komîsyon bi lez û bez were avakirin û dest bi xebatên xwe bike. 

 

ZEMÎNA SIYASÎ Û HIQÛQÎ

 

Bersiva vê tenê bi zemîna siyasî û hiqûqî dibe. Li şûna terkexemiyê, divê her kes bêhtir berpirsyartiyê li xwe bigire û ji bo serkeftina pêvajoya aştî û civaka demokratîk bêhtir bixebite. Nexwe em ê ji bo mayindekirina pêvajoyê zehmetiyan bikişînin.”

 

ROJ DIYAR NÎNE

 

Ayşegol Dogan piştre jî pirsên rojnamegeran bersivand. Ayşegul Doganê ji bo pirsa “Gelo dê beriya bêçekbûnê peyamek ji Ocalan were an na, dê li ku çek bên danîn” wiha got: “Em li bendê ne ku di hefteya pêş de li gorî Banga Aştî û Civaka Demokratîk a birêz Ocalan a 27’ê Sibatê û biryarên kongreyê guncav, gaveke dîrokî were avêtin. Ez nikarim bo we rojekê tam diyar bibêjim. Ev ne li gorî înîsiyatîfa me ye. Divê alî bi xwe aşkera bikin.” 

 

BAJAR DIYAR NÎNE 

 

Ayşegul Doganê da zanîn ku li gorî agahiyên li ber destê wan, dê ev gav li Herêma Federe ya Kurdistanê were avêtin lê bajar diyar nîne. Ayşegul Doganê, wiha domand: “Tişta dikeve ser milê her du aliyan ew e ku rewşa bêpevçûyînê mayinde bibe, ji bo şer bi temamî bi dawî bibe û çek ji dewrê derkevin, tişta pêwîst bikin. Em li bendê ne ku birêz Ocalan di nava çendek rojan de têkildarî mijarê daxuyaniyekê bide.”

 

NÛÇE DEREWAND 

 

Ayşegul Doganê ji bo îdiaya “Dê têkildarî berdana çekan toren were lidarxistin û dîmen bên parvekirin” jî got di vê mijarê de agahiyek li ber destê wan nîne û çavkaniyên wan agahiyeke wiha piştrast nekirine. Ji bo pirsa “Peyam dê bidîmen be yan na” jî Ayşegul Doganê anî ziman ku di vê mijarê de agahiyek li ber destê wan nîne lê ew dixwazin peyam bidîmen be.